Type 4199
(formerly typ/2294)

Κρήτης ὁ ποιμὴν δεῦρο παρὼν Ἀνδρέας,
ἀφίσταται γὰρ οὐδὲ τοῦ νῦν συλλόγου
τῷ πανταχοῦ παρόντι συνὼν δεσπότης,
τὸν Μυρέων πρόεδρον ὑμνεῖ τὸν μέγαν·
δοκεῖ γὰρ ἑστὼς εἰς τὰ τῆς τέχνης βάθη
τοσοῦτον ἀθρεῖν οὐρανὸν τεραστίων,
ψάμμον τε μετρεῖν ἢ φορυτὸν ἀστέρων,
ἢ κυμάτων πρόσχυσιν ἢ βλάστης γένος·
ἀλλ’, ὦ κιβωτὲ παντοδαπῶν θαυμάτων,
οὐρανίων θάλαμε θησαυρισμάτων,
ἥλιε τῆς γῆς ἄφθονε πτωχοτρόφε,
ἡ μὲν κάτω θάλασσα τῶν δεῦρο κρότων
χεῖται προσηνὴς, σὺ δ’ ἀναπλεῖς καὶ τρέχεις·
τοῦ πνεύματος γὰρ τὴν καλὴν αὖραν φέρεις,
καὶ λιμένας δή τινας ἀρρήτους ἔχεις,
ἀγωγίμοις βρίθουσι τὸν πλοῦν ἐξάγων.
Σοφὸς γὰρ εἶ σὺ τῶν ψυχῶν ἐπιστάτης
τὸν τοῦ βίου μάλιστα κοιμίζων σάλον,
καὶ τὰς ἀγωγὰς τῶν ἀβουλήτων λύεις,
καὶ τοὺς κατακλύζοντας αἱρεῖς κινδύνους.
Πλὴν εὐμενῶς τὸ δῶρον ὁ πρᾷος δέχου,
κἂν ἐξελέγχθη τοῖς κατορθώμασί σου·
εἰ γὰρ παρῆν ἐνταῦθα καὶ νοῦς ἀγγέλου,
καὶ γλῶσσα καινὴ, καὶ γραφῆς ἄλλης κρότος,
καὶ ῥημάτων δύναμις ὑπερκοσμίων,
ἔδραμεν ἂν ὅ φασι παρὰ Λύδιον,
ἐπείπερ αὐτὸς εἰς τὸ νικᾶν ἐκρίθης,
τροφεῦ προμηθεῦ, κἂν συνεκρίθης ὅμως.
Καὶ μὴν ἐπαινεῖς τὰς παραθέσεις, μάκαρ,
εἴ που τὶς ἀνθάμιλλον αὐτοῖς σε κρίνοι
τοῖς εὐδοκιμήσασι καὶ πρὸ τοῦ νόμου,
καὶ τοῖς μετὰ χάριτος ἠγωνισμένοις·
ὅταν γὰρ ᾖ τὸ πρᾶγμα νικῶν τὴν φύσιν,
οὐκ ἔστιν ὑμνεῖν ἀπὸ τῶν ὑπὲρ φύσιν,
ὥσπερ Θεοῦ θέλοντος ἐμφαίνειν θέαν,
καὶ τὸ ξένον πρόσλημμα τῆς μετουσίας
εἰς ἡλιακὸν παραμορφοῦμεν σέλας·
ἀλλ’ ἀκροατὴς τῶνδε τῶν λόγων γίνου,
καὶ τοὺς φόρους λάμβανε τοὺς ἐτησίους
ζυγοστατῶν τὸ ψῆγμα τῆς προθυμίας.
Ὁ Χριστὸς αὐτός ἐστι δεικνὺς ἐν τύπῳ
καὶ πρὸς τὰ λεπτὰ τῆς καλῆς χήρας βλέπων·
μᾶλλον δὲ καὶ πλούτιζε τοὺς πενεστάτους,
καὶ τὴν χάριν βράβευε δαψιλεστέραν·
ἰσάγγελος γὰρ καὶ πρὸ τῆς ἐκδημίας
ὑπῆρξας ἐν γῇ· σὺ δ’ ἐπευλόγει, θύτα.
Text source E. Miller, 1857, Manuelis Philae Carmina (vol. 2), Amsterdam: 337-339
Text status Text completely known
Editorial status Not a critical text
Genre(s) Author-related epigram
Person(s)
Poet
Manuel Philes (1275-1345) - PLP: XII.29817
Metre(s) Dodecasyllable
Subject(s)
Tag(s) Praise of the author
Bibliography
Number of verses 46
Occurrence(s) [20380] Κρήτης ὁ ποιμὴν δεῦρο παρὼν ἀνδρέας
ATHOS - Mone Dionysiou 228 (f. 124r-124v)
(45 verses)
Acknowledgements
Identification Vassis ICB 2005, 418: "Manuel Philes, In laudem s. Andreae Cretensis, qui s. Nicolaum laudibus ornavit (BHG 1361z)"
Permalink https://www.dbbe.ugent.be/types/4199
Last modified: 2019-12-11.