Type 4196
(formerly typ/2291)
| Τῷ Νικολάῳ τὸν προκείμενον λόγον | |
| ἐρεύγεται μὲν ὁ στεφηφόρος Λέων· | |
| λόχμην γὰρ ἂν εὕροι τίς αὐτοῦ τὸν βίον, | |
| κομῶσαν ἀβρῶς ἐν χλιδῇ τεραστίων. | |
| Τέρπει δὲ πᾶν ἔμμουσον ἀνθρώπων γένος, | |
| ἀλλ’ οὐ θορυβοῖ τοῖς βρυχηθμοῖς τῶν κρότων· | |
| βακχεύεται γὰρ ὑπὸ τῆς εὐερμίας, | |
| τοῖς ἐντόνοις ἅλμασιν τῆς τέχνης τρέχων, | |
| καὶ σκύμνος ἐστὶ καὶ τιθασὸς τὴν φύσιν, | |
| οὐδὲν φέρων γνώρισμα θηρὸς αὐθάδους. | |
| Ἔστι μὲν οὖν κράτιστον ἰδεῖν τὸν λόγον | |
| εἰς ῥυθμόν, εἰς κίνησιν, εἰς νοῦν, εἰς φράσιν, | |
| καὶ σχηματισμὸν ἀττικοῦ πλήρη κτύπου· | |
| Ἔστι δὲ καὶ πίθηκον αὐτόν που κρίνειν, | |
| ἢ πτῶκα δειλὸν πρὸς τὰ λαμπρὰ τοῦ βίου· | |
| ἐπείγεται γάρ, ἀλλ’ ὑποστρέφει τρέχων, | |
| καὶ τὸν τοσοῦτον ὄγκον οὐκ ἔχει στέγειν. | |
| Θάρσος γε μὴν ἄρρητον εὐνοίας φέρων, | |
| καὶ δορκάδος πρόεισιν διψώσης πλέον, | |
| εἰς τοὺς ἀγωγοὺς τῶν ὑπὲρ φύσιν μύρων. | |
| πλὴν ἀγγέλους ἔδει σε θαυμάζειν, μάκαρ, | |
| οἷς αὐτὸς ἀνθάμιλλος ἐκ γῆς εὑρέθης, | |
| ἀλλ’ οὐ ταπεινοὺς καὶ παρ’ ἀνθρώπων κρότους. | |
| Ἐπεὶ δὲ καὶ σὺ κατὰ τὸν σὸν δεσπότην | |
| εἰς καρδίαν βρέμουσαν ἐκ πόθου βλέπεις, | |
| πρὸς τῶν λόγων ἥδιστα τὴν σχέσιν δέχου. | |
| ἀνθ’ ὧν ἐφ ἡμᾶς θαυματουργεῖς ἀφθόνως, | |
| χαρισμάτων ἄβυσσον ἐξ ὕψους χέων. | |
| Εἰ μὴ γὰρ αὐτὸς πάντας ἡμᾶς εἱστίας, | |
| τεραστίων τράπεζαν ἁβρὰν ἀρτύων, | |
| τίς ἄν ποτε ζῶν ἐκρότει σε, δεσπότα, | |
| κάλλιστε ποιμήν, ἄφθονε πτωχοτρόφε, | |
| παγκόσμιον φῶς; Ἀλλ’ ἐπευλόγει θύτα. |
Last modified: 2023-09-05.
