Type 3037
(formerly typ/1141)

Ὡς ἄρα καπνὸς ἢ σκιὰ τὰ τοῦ βίου
καὶ τέφρα, καὶ χούς, καὶ κόνις πατουμένη,
ὁ πλοῦτος οὐδὲν ἢ βάρος κενὸν μόνον
ἡ δόξα πομφόλυξ τις ἐκφυσωμένη
τῶν ἀξιωμάτων δὲ μικρά τις χάρις·
ἕν ἄρα πάντων κατακαυχᾶται χρόνου
τῆς ἀρετῆς τὸ χρῆμα καὶ τὸ τοῦ λόγου
εἰς τί δὲ ταῦτα καὶ τίνος χάριν λέγω;
τίμιος ἀνήρ, εὐκλεής, καλοῖς βρίθων,
ὅσα τὲ γράφει ψυχικὴν ἀγλαΐαν,
ὅσα τὲ πλάττει σῶμα πρὸς εὐκοσμίαν,
τῆς ἀρετῆς εἰς ὕψος ὄρθιον φθάσας
λόγων τρόφιμος, εὖ ἔχων τῶν ἐν βίῳ,
ἀκροπολιτῶν ἐκ γένους κατηγμένος
Θεοῦ σοφίας ἁγνότατος λευΐτης·
τέλος δὲ ποιμὴν ποιμνίου τῶν Σκοπίων
κλῆσιν Μιχαήλ, οὐ μέχρι παντὸς βίου,
ἀλλά γε καὶ Μάξιμος ἐν μονοτρόποις
δεινοῦ παρανάλωμα πίπτει θανάτου,
νόσῳ βαρυνθεὶς καὶ τεταριχευμένος
καὶ τῶν τοσούτων ἀγαθῶν ἡ πλημμύρα,
ἔδυ κατὰ γῆς καὶ καλύπτεται τάφῳ
τὴν ἀρετὴν ἀφεῖσα καὶ μόνην ἄνω
μνήμης ἐκεῖνον ἀξιοῦσαν παγκάλως,
ὅν καὶ μονὴ κρύψασα νῦν ἔνδον φέρει
ἐν τοῖς Σκοπιῶν καθιδρυμένη τόποις
Γεώργιον τιμῶσα μαρτύρων κλέος·
εἰ τοίνυν ἀνδριάντα χαλκεύειν ἔδει
σώζοντα τούτου πᾶσι τοῖς ὀψιγόνοις
μνήμην ἀνεξάλειπτον εἰς μακροὺς χρόνους,
οὐκ ἄν τις ἀπώκνησε πρὸς τὴν δαπάνην
ἐπεὶ δὲ σεμνὸν οὐ πάνυ τι καὶ μέγα
ἑλληνικῆς μέντοι σε τοῦτο μωρίας·
ἐν μεμβράναις γράψαντι ἐνθέου βίβλου
μνήμῃ μακρᾷ κοσμοῦμεν οὕτω τὸν μέγαν
λόγους ἀναφέροντι ἱκετηρίους
ζώντων γραφῆναι τοῦτον ἄνω ταῖς βίβλοις.
Text source DBBE
Text status Text completely known
Editorial status Not a critical text
Genre(s)
Metre(s) Dodecasyllable
Subject(s)
Tag(s) Death
Critical Notes 26 Σκοπιῶν ] σκοπῶν Fonkič-Poljakov
Bibliography
Number of verses 37
Occurrence(s) [18771] ὡς ἄρα καπνὸς ἤ σκιὰ τὰ τοῦ βίου
MOSCOW - Gosudarstvennyj Istoričeskij Musej (GIM) - Sinod. gr. 122 (Vlad. 66) (f. 3v)
(37 verses)
Acknowledgements
Contributor(s)
Identification Vassis ICB 2005, 895: "Epitaphium in Michaelem/Maximum Acropolitem ep. Scopiorum"
Permalink https://www.dbbe.ugent.be/types/3037
Last modified: 2019-11-21.