Type 6907
(formerly typ/4807)

Πάλαι βασιλεὺς τῶν σοφῶν συνθεὶς λόγους,
τῶν τῆς παλαιᾶς καὶ νέας μυστηπόλων,
ἤδρασεν, ἐστήριξε τοὺς κλονουμένους,
ἐπεστόμισε τὰ στίφη τῶν φληνάφων,
τῶν ὡς ἀληθῶς ὑποφητῶν βελίαρ,
λόγους προτείνων ἐκ θεογράφων βίβλων,
καὶ συμπεραίνων ἀσφάλειαν δογμάτων.
Καὶ νῦν βασιλεὺς εὐσεβής, οὐ συγγράφων.
Μᾶλλον δὲ συγγράφουσιν οὐ κεχρημένος,
ἀλλ' αὐτὸς αὐχῶν καρδίας ἐν πυξίδι,
λόγους ἀκριβεῖς τῶν σοφῶν θεηγόρων,
ὡς καὶ πᾶν ἄλλο τῶν ἀγαθῶν, πλουσίως
ψυχῆς τε πλαξὶ καὶ φρενῶν κεύθει βάθει,
καὶ τοῖς συνοῦσι καθεκάστην ἐκφέρων,
καὶ διὰ τούτων τοὺς μακράν, τοὺς ἐγγύθεν,
ὀρθὰ φρονεῖν τε μυσταγωγῶν καὶ λέγειν,
ἓν χεῖλος ἀνέδειξε τοὺς ἑνὸς φύλου,
θεὶς δόγμα πᾶν ἔκφυλον ὡς πορρωτάτω,
καὶ δόξαν εἰσφρήσασαν ἐξ ἀλλοθρόων.
ἐκεῖνον, ὅστις, ἡ γραφὴ δείκνυσί σοι,
καὶ τοῦτον, ὅστις, ἐξ ἐμῶν λόγων μάθε,
παλαιολόγος Ἀνδρόνικος αὐτάναξ,
οὗ γνῶσις ἀσύγκριτος εἰς τὰ πρακτέα,
οὗ γλῶττα θαυμάσιος εἰς τὰ λεκτέα,
ὃν ἀγλαΐζει τῶν τρόπων ἡ χρηστότης,
ὃν ἀρεταὶ κοσμοῦσιν ὑπὲρ τὸ στέφος,
ὅς, συνελὼν εἴποιμι, καλῶν ἑστία,
καὶ τῶν χαρίτων εὐπρεπὴς συνοικία.
Ἀλλὰ φυλάττοι τοῦτον εἰς μακροὺς χρόνους
ὁ τῶν ἀγαθῶν παροχεύς τε καὶ φύλαξ,
καὶ συμφυλάττοι τὸν πεφιλμένον γόνον,
τὸν Μιχαήλ, ἔρεισμα τῆς σκηπτουχίας,
τὴν τῆς ἁπάσης καλλονὴν κραταρχίας.
Τὴν λαμπρὰν ὄντως ἐλπίδα ῥωμαΐδος,
ὃς δόξα πατρός, Σολομῶν ὡς που γράφει,
οὗ δόξα Πατὴρ ἀγαθὸν πλουτῶν ἅπαν.
Ἐπὰν μεταστήσῃ δὲ τούσδε τοῦ βίου,
τὴν βασιλείαν οὐρανῶν δῴη λάχος,
καὶ συναριθμήσειεν ἁγίων στίφει.
Editorial status Not a critical text
Genre(s) Text-related epigram
Metre(s) Dodecasyllable
Subject(s)
Tag(s)
Comment The text is based on PG 130, 11-12, with some adjustments due to the consultation of the manuscript where the poem appears.
Bibliography
Number of verses 39
Occurrence(s) [25858] πάλαι βασιλεὺς τῶν σοφῶν συνθεὶς λόγους
MOSCOW - Gosudarstvennyj Istoričeskij Musej (GIM) - Sinod. gr. 387 (Vlad. 224) (f. 4v-5r)
(39 verses)
Identification Vassis ICB 2005, 590: "In Andronicum Palaeologum et Michaelem filium de panoplia dogmatica"
Permalink https://www.dbbe.ugent.be/types/6907
Last modified: 2019-05-31.